Kəlbəcər rayon ictimayəti Xocalı soyqırımı qurbanlarının əziz xatirəsini yad edib.
Respublikamızın hər yerində olduğu kimi Kəlbəcər rayonundan da, Xocalı faciəsi qurbanlarının əziz xatirəsi dərin hüznlə yad edilmişdir.Belə ki, rayonda fəaliyyət göstərən YAP Kəlbəcər Rayon Təşkilatında, Kəlbəcər Rayon Təhsil Şöbəsində, Kəlbəcər Rayon Mərkəzi Xəstəxanasında, Aşıq Şəmşir adına mədəniyyət evində, Kəlbəcər Rayon Statistika İdarəsində, Kəlbəcər Rayon Suvarma sistemləri idarəsində, Kəlbəcər Rayon Sukanal idarəsində, Kəlbəcər Rayon Baytarlıq İdarəsində, Kəlbəcər Rayon Dövlət Aqrar İnkişaf Mərkəzində, Kəlbəcər Rayon Mənzil Kommunal Təsərrüfat Müəssisəsində, Kəlbəcər Rayon Rabitə Qovşağında , rayonun ümumtəhsil məktəblərində və məktəbəqədər təhsil müəssiələrində onlayın formada eləcədə ölkəmizdə tətbiq edilən karantin qaydalarına riayət etməklə və sosial məsafə gözlənilməklə Xocalı faciəsinə həsr edilmiş anım tədbirləri keçirilib.Tədbirdə faciə qurbanlarının və vətənimizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib, uca Tanrıdan şəhidlərimizə rəhmət diləyiblər.Keçirilən tədbirlərdə bildirilmişdir ki, artıq Xocalı soyqırımından 29 il ötür. 1992-ci il fevralın 25-dən 26-na keçən gecə erməni silahlı dəstələri sovet ordusunun Xankəndi şəhərində yerləşən 366-cı alayının iştirakı ilə Xocalı şəhərini yerlə-yeksan etdi. Erməni təcavüzkarlarının Azərbaycan xalqına qarşı törətdiyi növbəti kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca dünyasını dəyişdi. 1275 dinc sakin əsir götürüldü, 150 nəfərin taleyi isə hələ də məlum deyil. Bu soyqırımı aktı nəticəsində 8 ailə tamamilə məhv edildi, 25 uşaq hər iki valideynini, 132 uşaq isə valideynlərindən birini itirdi.
Xocalı faciəsi təcavüzkar erməni millətçilərinin xalqımıza qarşı törətdiyi soyqırımı və etnik təmizləmə siyasətinin qanlı səhifəsidir. Azərbaycan dövləti ötən illər ərzində erməni millətçilərinin xalqımıza qarşı törətdiyi cinayətlər, o cümlədən, Xocalı soyqırımı haqqında həqiqətlərin dünya ictimiyyətinə çatdırılması, onun soyqırımı kimi tanıdılması üçün ardıcıl fəaliyyət göstərib. Faciə ilə bağlı həqiqətlərin dünya ictimaiyyətinə çatdırılmasında Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyeva böyük xidmətlər göstərib. Fondun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq kampaniyası çərçivəsində də hər il silsilə tədbirlər reallaşdırılır. İndiyə qədər 10-dan çox ölkə və İslam Əməkdaşlıq Təşkilatı Xocalı faciəsini soyqırımı kimi tanıyıb.
Xocalı soyqırımını törətməkdə düşmənin məqsədi torpaqlarımızı zorla ələ keçirmək olsa da, bu ağır faciə xalqımızı daha da mətinləşdirdi, qəhrəman övladlarımızı Vətən və milli dövlətçiliyimiz naminə qətiyyətli və mütəşəkkil mübarizəyə səfərbər etdi. İllər keçdi. 2020-ci ildə baş verən Vətən müharibəsində müstəqilliyin övladları 30 il işğal altında qalan torpaqlarımızı azad etməklə yeni reallıq yaratdı, “dəmir yumruq” qalib gəldi. 44 günlük müharibədə misilsiz igidlik nümunələri göstərən qəhrəman ordumuz Müzəffər Ali Baş Komandanın rəhbərliyi ilə Xocalı faciəsi qurbanlarının da qisasını aldı, şəhidlərimizin qanı yerdə qalmadı. Azərbaycan öz ərazi bütövlüyünü bərpa etdi, Vətən bütövləşdi. Bununla da xalq öz rəhbərinin ətrafında yumruq kimi birləşərək tarixi hədəflərinə qovuşdu.
