Novruz bayramı münasibətilə tədbir keçirildi
18 mart 2014-cü il tarixdə Gəncə şəhərində Kəlbəcər rayon İcra hakimiyyəti başçısı aparatının qarşısındakı meydanda xalqımızın ən gözəl bayramı olan Novruz bayramı münasibətilə tədbir keçirildi.
Tədbirdə Kəlbəcər rayon İcra hakimiyyətinin başçısı Aqil Məmmədov, hüquq-mühafizə orqanlarının rəhbərləri, idarə, müəssisə, təşkilat rəhbərləri, rayonun ziyalıları, ağsaqalları və minlərlə rayon sakini iştirak etdi.
Rayon İcra hakimiyyətinin başçısı Aqil Məmmədov əvvəlcə milli adət ənənələrimizi özündə əks etdirən əl işləri, milli mətbəximizlə tanış oldu və bayram tonqalına alov vuraraq möhtəşəm bayram tədbirini açıq élan etdi.
Əvvəlcə Kosa və Keçəlin yumoristik səhnələri və eyni zamanda da körpə fidanlara öz Novruz hədiyyələrini verməsi, oyunbazların göstərdiyi oyunlar, idmançılarımızın meydanda öz idman növlərini təqdim etmələri və yumurta döyüşləri şənliyə xüsusi rəng qatdı.
Tədbirin sonunda Heydər Əliyev adına Kəlbəcər rayon Mədəniyyət evinin öz fəaliyyət kollektivinin ifacıları və Heydər Əliyev Mərkəzində fəaliyyət gostərən rəqs dərnəyinin şagirdlərinin ifası ilə geniş konsert proqramı təqdim olundu.
